काठमाडौं– कोरोना भाइरसको संक्रमण बढिरहेका कारण लकडाउन घोषणा गरिएको चीनको साङ्घाई शहरतर्फ तिब्बतबाट ठूलो परिमाणमा याकको मासु र पिउने पानी लगिएको छ ।

‘महामारी विरुद्धको आपूर्ति’ का रुपमा तिब्बतबाट ३ हजार टन पिउने पानी र १ सय टन याकको सुख्खा मासु साङ्घाईतर्फ लगिएको हो ।

साङ्घाईमा पछिल्लो समय कोरोना भाइरसका संक्रमितको संख्या बढ्दै गइरहेको बताइएको छ ।

तिब्बती अधिकारवादी समूहलाई उद्धृत गर्दै भारतीय समाचार संस्था एएनआईले जनाएअनुसार ‘तिब्बत स्वशासित क्षेत्रस्थित सत्तारुढ कम्युनिष्ट पार्टीको सरकार तथा समितिको निर्देशनमा तिब्बतबाट ती सामान साङ्घाईतर्फ आपूर्ति गरिएको हो ।

यता चीनको सरकार नियन्त्रित टेलिभिजन नेटवर्क सीजीटीएनले भने तिब्बतले ती सामान ‘दान’ गरेको टिप्पणी गरेको छ ।

यसअघि चीनमा कोरोना भाइरसको पहिलो लहरका बेला पनि तिब्बतबाट जडिबुटीहरू प्रभावित क्षेत्रतर्फ लगिएको जनाइएको छ ।