जनकपुरधाम– रेल्वेका पुराना कर्मचारीहरूले जनकपुरधाम स्टेशनस्थित कार्यालयमा तालाबन्दी गरेका छन् । पुरानो रेल्वे कर्मचारी संघर्ष समितिको नेतृत्वमा पुराना कर्मचारीहरूले शुक्रबार कार्यालयमा तालाबन्दी गरेर प्रदर्शन गरेका हुन् ।

आफूहरूलाई नेपाल रेल्वेका महाप्रबन्धन निरञ्जन झाले बिनाकारण हटाएको भन्दै उनीहरूले पुनर्नियुक्तिको माग गर्दै आएका छन् । उनीहरूले हाल तालिम लिइरहेका ज्यालादारी कर्मचारीहरूको नियुक्ति बदर गर्न पनि माग गर्दै आएका छन् । नेपाल रेल्वेका महाप्रबन्धक झाले गैरकानुनी तरिकाले आफूहरूलाई हटाएर आफ्ना कार्यकर्ताहरूलाई गुपचुप तरिकाबाट तालिम दिइरहेको उनीहरूको आरोप छ ।

अहिलेको भर्ना बदर गरी आफूहरूलाई नियुक्त नगरेसम्म चरणबद्ध आन्दोलन जारी राख्ने समितिका संयोजक मञ्जय गोइतले चेतावनी दिए ।

रेल्वेका पुराना कर्मचारीलाई कामकाजमा खटाउने मन्त्रिपरिषद्को निर्णयबमोजिम तत्कालीन महाप्रबन्धक गुरु भट्टराईले २०७८ साल वैशाख ४ गतेबाट उनीहरूलाई ज्यालादारीमा नियुक्त गरेका थिए । वैशाख ८ गतेबाट उनीहरूलाई भारतबाट प्रशिक्षक मगाएर विशेष तालिम पनि दिइएको थियो ।

तर, नयाँ महाप्रबन्धक निरञ्जन झा आएपछि २०७८ साल भदौं १८ गते सूचना निकालेर उनीहरूको हाजिरी रोक्का गरिदिएका थिए । झाले रेल्वेका पुराना ६५ सहित १ सय ५१ जनाको हाजिरी रोक्का गरिदिएका थिए । तर, अहिले आएर ६१ जनालाई भर्ना गरी तालिम दिन सुरु गरिएपछि पुराना कर्मचारीहरू आन्दोलित भएका हुन् ।