काठमाडौँ- भारतको राजधानी दिल्लीका मुख्यमन्त्री अरविन्द केजरीवालले भारतीय रुपैयाँमा महात्मा गान्धीका साथै हिन्दू देवीदेवताको तस्वीर राख्न केन्द्र सरकारसमक्ष माग गरेका छन् ।

केजरीवालले भारतीय रुपैयाँमा गान्धीका साथै हिन्दू देवीदेवताहरु लक्ष्मी र गणेशको तस्वीर राख्न केन्द्र सरकारसमक्ष माग गरेको भारतीय समाचार च्यानल आजतकले जनाएको छ ।

भारतीय रुपैयाँमा हिन्दू देवीदेवताको तस्वीर राखेको खण्डमा अर्थतन्त्रमा सुधार आउने उनको विश्वास छ । उनले नयाँ नोट छाप्ने बेला लक्ष्मी र गणेशको तस्वीर राख्न सकिने जनाएका छन् ।

हिन्दूहरुको चाड दिवालीलगत्तै केजरीवालले केन्द्र सरकारसमक्ष विघ्नहर्ता देवता गणेश र धनकी देवी लक्ष्मीको तस्वीर राख्न माग गरेका हुन् ।

हिन्दू राष्ट्रवादी भारतीय जनता पार्टी भाजपाको नेतृत्वमा रहेको केन्द्र सरकारसमक्ष उनले गरेको मागलाई निकै चासोपूर्वक हेरिएको छ ।