काठमाडौँ : प्राध्यापक डाक्टर विश्वम्भर प्याकुर्‍यालले ठूला दल तीनतिर लाग्दा देशमा आर्थिक संकट गहिरिएको बताएका छन् । तीन ठूला दल नेकपा एमाले, नेकपा माओवादी र नेपाली कांग्रेसले तीनतिर मुख लाउँदा अहिलेको संकट चुलिएको उनले बताएका हुन् ।

एमालेको गभर्नर, नेपाली कांग्रेसको योजना आयोगको उपाध्यक्ष र माओवादीको अर्थमन्त्रीबीच समन्वय नहुँदा अहिलेको अवस्था आएको उनले बताए ।

‘अर्थतन्त्र बन्ने र सुध्रिने भनेको त अर्थमन्त्रालय, राष्ट्र बैंक र गभर्नरबीच समन्वय भएर होला नि त’ उनले भने, ‘तर माओवादीको अर्थमन्त्री एकातिर, कांग्रेसको योजना आयोग उपाध्यक्ष अर्कोतिर अनि एमालेको गभर्नर झन् अर्कैतिर छन् । यस्तो अवस्थामा राष्ट्र बैंकले मात्रै के गर्न सक्छ ?’

अर्थमन्त्री रहेका जनार्दन शर्माले राजीनामा दिएका छन् । योजना आयोगका उपाध्यक्ष विश्व पौडेल कांग्रेसनिकट हुन् भने एमालेनिकट गभर्नर महाप्रसाद अधिकारी केही समयअघि एमालेकै अर्थ विभागमा ‘एम अधिकारी’ नामले सदस्य हुँदा चर्को आलोचना भएको थियो ।

देशको वर्तमान अवस्था आउनुमा मुख्य दलका मुख्य नेता जिम्मेवार रहेको पनि उनको भनाई छ । बाहिर सबैले एकले अर्कोलाई आरोप लगाउने भएपनि वास्तविक जिम्मेवार मुख्य दलका मुख्य नेता हुनुपर्ने उनको भनाई ।

‘अरुलाई गाली नगरौँ । यो अवस्था आउनुमा मुख्य रुपमा नेताहरु जिम्मेवार छन् । उनीहरु दोषी छन्’ मौद्रिक नीतिमाथिको छलफलमा आइएसएसआरका प्रमुख प्याकुर्‍यालले कार्यक्रमको सारमा भने, ‘त्यसैले सरकार चलाउने नेताहरु जिम्मेवार हुनुपर्छ, राष्ट्र बैंकलाई मात्र गाली गरेर केही हुँदैन ।’

नेताहरुको यही प्रवृत्तिले गर्दा नेपाल पनि श्रीलंकाकै अवस्थामा पुग्ने उनको भनाई छ ।