काठमाडौँ- हालै राजीनामा दिएकी सहरी विकासमन्त्री रामकुमारी झाँक्रीले आफ्नो पार्टीले समीक्षा बैठक डाकेर मन्त्री फेर्ने निर्णय सुनाएको आरोप लगाएकी छिन् ।

आज पत्रकार सम्मेलनमा बोल्दै झाँक्रीले पार्टीले मन्त्री फेर्नुअघि छलफल गर्ने अपेक्षा गरेको भएपनि अध्यक्षले एकतर्फी रुपमा छलफल नै नगरी निर्णय गरेको बताइन् ।

यसअघि नेकपा एकीकृत समाजवादीले मन्त्री फेर्ने निर्णय गरेपछि उनले राजीनामा दिएकी थिइन् । उनीसँगै आजै एकीकृत समाजवादीका अर्का मन्त्री प्रेम आलेले पनि मन्त्रीबाट राजीनामा दिएका छन् ।

मन्त्रीबाट राजीनामा दिने घोषणा गर्न आयोजना गरिएको पत्रकार सम्मेलनमा रामकुमारी झाँक्री भावुक बनेकी थिइन् । कार्यक्रम भावुक हुँदै झाँक्रीले आँसु झार्न थालेपछि बोल्ने कार्यक्रम पछि सारिएको थियो ।

उनले मन्त्रालयमा बिताएको समयमा प्राप्त उपलब्धिलाई कर्मचारीले प्रस्तुत गरेका थिए ।