काठमाडौँ- पाकिस्तानले सरकारी स्वामित्वमा रहेका कम्पनीहरुको शेयर विदेशीलाई पनि बिक्री गर्ने भएको छ ।

पाकिस्तानी अर्थमन्त्री मिफ्ताह इस्माइललाई उद्धृत गर्दै पाकिस्तानबाट प्रकाशित हुने डन अखबारको अनलाइन संस्करणले जनाएअनुसार पाकिस्तानले मैत्रिपूर्ण मुलुकहरुलाई सरकारी स्वामित्वमा रहेका कम्पनीको शेयर बिक्री गर्न लागेको हो ।

यस्तो शेयरको खरिद बिक्री सरकारी स्तर (जीटुजी) बाट हुने जनाइएको छ । आवश्यक परेको खण्डमा सरकारले ती शेयर पुनः खरिद गर्न सक्नेगरी व्यवस्था पनि गरिएको डनले उल्लेख गरेको छ ।

पाकिस्तानी अर्थमन्त्री इस्माइलले चाँडै सरकारले केही आयातित वस्तुहरुमा लगाएको प्रतिबन्ध पनि चाँडै फुकुवा गर्ने समेत जनाएका छन् ।

आर्थिक समस्या झेलिरहेको पाकिस्तानको आर्थिक अवस्था अझै खराब बन्दै जाने चिन्तामाझ पाकिस्तानी अर्थमन्त्रीको यस्तो भनाइ सार्वजनिक भएको हो ।