काठमाडौं– रोहित पौडेल एक दिवसीय क्रिकेटमा एकै इनिङ्गमा नेपालका लागि सर्वाधिक रन बनाउने खेलाडी बनेका छन् ।

कीर्तिपुरको टियू मैदानमा पपुवा न्यूगिनी विरुद्ध भएको खेलमा उनले सर्वाधिक १२६ रन बनाए ।

१०७ बलको सामना गरेका उनलाई ४५ ओभर २ बलमा नोरमन भानुआले आउट गरेका थिए ।

यसअघि यो कीर्तिमान पूर्व कप्तान पारस खड्काको नाममा रहेको थियो ।

खड्काले युएईविरुद्ध सन् २०१९ मा सर्वाधिक ११५ रन बनाएका थिए ।

रोहितको कीर्तिमानी पारीका बावजुद खेलमा नेपाल भने ६ रनले पराजित भएको छ ।

टस जितेर नेपालले फिल्डिङ रोजेपछि पहिले ब्याटिङ गर्न आएको पपुवा न्यूगिनीले निर्धारित ५० ओभरमा ८ विकेट गुमाउँदै २९२ रन बनाएपछि नेपालले २९३ रनको लक्ष्य पाएको थियो । नेपालका लागि कमल सिंह ऐरी, दीपेन्द्र सिंह ऐरी र सोमपाल कामीले समान २ विकेट लिए ।

त्यस्तै, पवन सर्राफ र कप्तान सन्दीप लामिछानेले १–१ विकेट लिए । दोश्रो इनिङमा नेपालले निर्धारित ५० ओभरमा ८ विकेट गुमाउँदै केबल २८६ रन मात्र बनाउन सक्यो । नेपालका लागि रोहितले १२६ रन बनाउनुबाहेक अरु ब्याट्सम्यान चल्न सकेनन् ।

आरिफ शेखले ३४ र ओपनिङ ब्याट्सम्यान कुशल भुर्तेलले ३२ रन बनाए । नेपालले भोलि नै पपुवा न्यूगिनीविरुद्ध दोश्रो एकदिवसीय अन्तर्राष्ट्रिय खेल्नेछ ।