काठमाडौँ- क्षयरोग नियन्त्रणका लागि लामो समयदेखि आफ्नो योगदान दिँदै आएका पूर्व प्रमुख विशेषज्ञ डा. भीमसिंह तिंकरीले गोल्ड मेडल प्राप्त गरेका छन्। दीर्घ राना समुन्द्र फाउन्डेसनले विश्व क्षयरोग दिवसको अवसरमा डा. तिंकरीलाई गोल्ड मेडलले सम्मान गरेको हो।

त्यस्तै, डीटीएलओ, स्वास्थ्य कार्यालय रौतहटका राजकुमार शाह, बझाङको क्षयरोग स्वास्थ्य कार्यालयका फोकल पर्सन नारायणप्रसाद जोशी, एएचडब्लु, स्वास्थ्य कार्यालय डोल्पाका कर्णबहादुर विक र डीटीएलओ स्वास्थ्य कार्यालय सुनसरीका विजय गुरागाईंलाई पनि फाउन्डेसनले सम्मान गरेको छ ।

उक्त फाउन्डसनले आफ्नो स्थापनाकालदेखि नै प्रत्येक वर्ष क्षयरोग दिवसको दिन क्षयरोग निवारणमा योगदान पुर्‍याउँदै आएका व्यक्तित्वहरुलाई सम्मान गर्दै आएको छ।

त्यसैगरी, दिक्षा दक्ष सेवा पुरस्कार कोषले पनि क्षयरोग नियन्त्रण तथा उपचारमा निरन्तर सेवा दिइरहेका ३ जना व्यक्तिवलाई सम्मान गरेको छ। सम्मानित हुनेहरुमा ललितपुरको हरिसिद्धि स्वास्थ्य चौकीकी राज्यलक्ष्मी महर्जन, बर्दघाटका ल्याब टेक्निसियन डिल्लीराम तिवारी र स्वास्थ्य कार्यालय प्युठानका सुपरभाइजर मधुसदन खड्का रहेका छन्।