तेह्रथुम – जिल्लाको आठराई गाउँपालिका–३ ह्वाकुका सुमन गुरुङले विदेशमा भन्दा पनि आफ्नै घरगाउँमा आजकल राम्रो कमाइ गर्न थालेका छन्। चार वर्ष विदेश बसेर दुई वर्ष अगाडि घर फर्केका २७ वर्षीय गुरुङले स्वदेशमै भेडापालन गरेर विदेशमा भन्दा राम्रो कमाइ गर्न थालेका हुन्।

कोरोनाका कारण घर फर्केका गुरुङ अब के गरेर जीवन चलाउने भन्ने सोचमा थिए। त्यत्तिकैमा आफ्नो पुख्र्यौली पेशा रहेको तर हाल लोपोन्मुख हुँदै गएको भेडापालन गरेर पनि आम्दानी लिन सकिने सोच मनमा आयो। विदेशबाट आएपछि आफ्नै गाउँ–ठाउँमा केही गर्ने मनसाय लिएका गुरुङलाई स्थानीय संस्था देउराली सोसाइटीले जागरुक बनाउन मद्दत गर्‍यो।

अहिले भेडापालनबाट गुरुङले मासु र राडीपाखी बेचेर मनग्य आम्दानी गर्न थालेका छन्। एउटै थुमालाई २० हजारदेखि ३० हजार रुपैयाँसम्ममा बेच्ने गरेको गुरुङले सुनाए। खसी, बोका, बङ्गुरभन्दा पनि भेडा बढीमा बिक्री हुने उनी बताउँछन्। हाल गुरुङसँग ५० भन्दा बढी भेडा छन्।

गुरुङले घर नजिकै गोठ बनाएर अहिले भेडा पालन गरेका छन्। परिवारका आठ सदस्यको लालनपालन खर्च भेडापालनबाट हुने आम्दानीबाट चल्दै आएको उनले बताए। ‘घरखर्च कटाएर केही रकम बचत हुन्छ’, गुरुङले भने, ‘अन्य व्यवसायभन्दा बढी आम्दानी हुने गरेको छ।’ गुरुङले भेडापालनबाट वार्षिक रु तीन लाखको हाराहारीमा आम्दानी हुने गरेको जनाए।

देवी–देवतालाई बलि दिन र विभिन्न चाडपर्वमा खानका लागि भेडा किन्न ग्राहक गुरुङको घरमै आउने गरेका छन्। गाउँछेउकै जङ्गलमा प्रशस्त घाँसपात रहेकाले भेडापालन सहज भएको उनी बताउँछन्। ‘बिक्रीका लागि कसैलाई गुहार्नु पर्दैन, ग्राहक घरमै आएर लैजान्छन्।’ आफ्नै गाउँठाउँमा मेहेनत गरे विदेशमा भन्दा राम्रो कमाइ हुने गुरुङ अरुलाई सुझाव दिन्छन्।