गलकोट- बागलुङ नगरपालिका–१० भकुण्डेका हर्कबहादुर थापाले लगाएको किवीको एउटा बोटमा मात्रै गत वर्ष एक सय ५० किलो फल्यो । थापाले बारीमा पाँच बोट मात्रै किवी लगाएका छन्। पाँच बोटमै वार्षिक पाँच सय किलो किवी फल्ने गरेको उनी बताउँछन् ।

मलजल र थाक्रो भएमा एउटै बोटमा धेरै किवी फलाउन सकिने थापाको अनुभव छ । “पहिला किवी परीक्षणका लागि लगाए, अब अन्य स्थानमा खेती विस्तार गर्ने योजनामा छु”, उनले भने । अहिले भकुण्डेमा थापासहित अन्य किसानले व्यावसायिक रुपमा किवी खेती गर्दै आएका छन् । पछिल्लो समय किवी खेती गर्ने किसानको सङ्ख्यामा बढ्दै गएको छ । काँटछाँट र उचित हेरचाह गर्नसके मनग्य आम्दानी गर्न सकिने किसान बताउँछन् ।

पर्यटकीय गाउँका रूपमा परिचित भकुण्डेको उपल्लो भागमा घर बास (होमस्टे) फस्टाउँदै गएको छ । सोही क्षेत्रमा किवीको सफल उत्पादन भइरहेको छ । पाहुनाले किवी रुचाउने गरेकाले बजारको समस्या नभएको अतिथि सत्कार घर बासका सञ्चालक इन्द्रकुमारी थापाले बताइन्। भकुण्डेमा फस्टाउन थालेको किवी खेतीलाई प्रोत्साहन गर्ने खालका कार्यक्रम ल्याइने बागलुङ–१० का वडाध्यक्ष तिलबहादुर थापा बताउँछन्।

“किवी खेतीको राम्रो सम्भावना छ”, उनले भने । भकुण्डेको तल्लो भागमा सुन्तला खेती र उपल्लो भागमा किवी खेतीका लागि किसानलाई प्रोत्साहन गर्ने योजना वडा कार्यालयसँग छ । किवी प्रतिकिलो स्थानीय बजारमा रु तीन सयदेखि रु तीन सय ५० सम्ममा बिक्री हुन्छ । किवीको नियमित सेवनबाट गर्भवती, रक्तचाप, मुटु, रुघाखोकीलगायत बिरामीलाई विशेष फाइदा पुग्छ ।

बजारमा माग बढ्दै गएको बागलुङ नगरपालिकाका कृषि शाखा प्रमुख राहुल केसीले जानकारी दिए। किवी खेती एक हजार दुई सयदेखि दुई हजार फिटसम्मको उचाइमा गर्न सकिन्छ । रोपेको तीन वर्षपछि किवीले उत्पादन दिन थाल्ने किसान बताउँछन् ।