काठमाडौँ– सञ्चार तथा सूचना प्रविधिमन्त्री ज्ञानेन्द्रबहादुर कार्कीले उद्यमशीलताको प्रवर्द्धनमा सरकार प्रतिबद्ध रहेको बताएका छन् ।

बुधबार काठमाडौँमा ‘कनेक्ट इन’को तेस्रो संस्करणअन्तर्गत तेस्रो अन्तर्राष्ट्रिय उद्यमशीलता सम्मेलनमा मन्त्री कार्कीले मुलुकको आर्थिक विकासमा उद्यमशीलताको भूमिका निकै महत्वपूर्ण रहेको भन्दै यसको प्रवर्द्धनमा सरकार प्रतिबद्ध रहेको बताएका हुन् ।

मन्त्री कार्कीले उद्यमशीलताको विकास तथा स्टार्टअप व्यवसायलाई सरकारले प्रोत्साहित गर्ने नीति लिएको पनि बताए ।

सरकारले मुलुकको आर्थिक गतिविधिलाई चलायमान बनाउन र वैदेशिक लगानी भित्र्याउन लगानीमैत्री नीति लिएको भन्दै सेवा प्रवाहलाई सरलीकृत गरी प्रक्रियागत झन्झटलाई हटाइएको पनि उनले बताए ।

सरकारले स्थापना गरेको एकल बिन्दु सेवाबाट उद्योगी व्यवसायीलाई व्यावसायिक गतिविधि बढाउन सहयोग मिलेको उनको भनाइ थियो ।

मन्त्री कार्कीले व्यवसाय प्रबर्द्धन, उद्यमीको क्षमता अभिवृद्धि र वित्तीय सहजीकरण गर्न सरकारले यससम्बन्धी नीति परिमार्जन गरेको पनि बताए ।

सम्मेलनमा भारतीय राजदूत विमानमोहन क्वात्राले अन्वेषण र उद्यमशीलता भारत सरकारको प्राथमिकतामा रहेको भन्दै भारत र नेपालका युवा उद्यमीको क्षमता अभिबृद्धि गर्न सम्मेलनले महत्वपूर्ण भूमिका निर्वाह गर्ने विश्वास व्यक्त गरेका छन् ।

क्लक वि बिजनेस इनोभेसन्स् र काठमाडौँस्थित भारतीय दूतावासको सहकार्यमा ‘कनेक्ट इन’ को तेस्रो संस्करणका रूपमा सम्मेलनको आयोजना गरिएको हो । ‘कनेक्ट इन’को पहिलो संस्करण सन् २०१८ र दोस्रो संस्करण सन् २०१९ मा भएको थियो ।