काठमडौँ– अल्पसङ्ख्यकमाथि असहिष्णुता देखाउने गरेको आरोप खेपिरहेका बेला पाकिस्तानमा शिख धर्ममा पवित्रस्थल मानिने एउटा गुरुद्वारा बन्द गरिएको छ । पाकिस्तानको लाहोर सहरमा रहेको शहिद भाइ तरु सिंह गुरुद्वारा बन्द गरिएको हो ।

विभाजनको समयमा पाकिस्तान छाडेर भारत गएका मानिसहरुको सम्पत्ति जफत गर्ने निकायले उक्त गुरुद्वारा स्थायी रुपमा बन्द गरिएको डेली शिख नामक अनलाइनले जनाएको छ ।

लाहोर सहरमा रहेका शिख धर्मावलम्बीलाई गुरुद्वारा बन्द गरिनुको कारणबारे केही जानकारी दिइएको छैन । गुरुद्वारा बन्द गर्ने कदमबाट त्यहाँका शिख धर्मावलम्बीहरु चिन्तित बनेको बताइएको छ ।

शिख धर्मावलम्बीका प्रतिनिधिले जिल्ला प्रशासन र सम्पत्ति जफत गर्ने निकायका अध्यक्ष हबिबुर रहमान गिलानीलाई गुरुद्वारा पुनः खोल्न आग्रह गरेको भएपनि यसबारे कुनै जवाफ प्राप्त नगरेको डेली शिखले उल्लेख गरेको छ ।