काठमाडौँ – फ्रेन्च लिग वानमा पेरिस सेन्ट जर्मेइन (पीएसजीले) एसी एजासियोलाई ३–० ले पराजित गर्दै अपराजित यात्रा जारी राखेको छ।

अर्जेन्टिनी फर्वाड लियोनेल मेसी र केलियएन एम्बाप्पेले उत्कृष्ट प्रदर्शनमा पीएसजीले रेलिगेसन जोनमा रहेको एजासियोलाई उसकै मैदानमा पराजित गरेको हो।

पीएसजीका लागि २४ मिनेटमा मेसीको पासमा एमबाप्पेले पहिलो गोल गर्दै सुरुवाती अग्रता दिलाएका थिए। दोस्रो गोल मेसीले गरे। उनले ७९औं मिनेटमा एम्बाप्पेको पासलाई सापटी लिए। तेस्रो गोल फेरि ८२ मिनेटमा मेसीकै पासमा एम्बाप्पेले गरे।

यससँगै पीएसजी लिगको शीर्षस्थानमा कायम रहेको छ। उसले १२ खेलबाट ३२ अंक पुर्‍याएको छ। पीएसजीले १० जित र २ बराबरीको नतिजा निकालेको छ। पीएसजीले दोस्रो स्थानमा रहेको लोरिएन्टलाई ६ अंकले पछि पारेको छ।

लोरिएन्टले एक खेल कम खेलेको छ। पराजित एजासियो ८ अंक जोडेर १८औँ स्थानमा छ।