जनकपुर – सत्ता गठबन्धनको चुनावी सभा आज दुई प्रदेशका दुई ठाउँमा आयोजना गरिएको छ।

शुक्रबार पोखरा र बुटवलमा कार्यक्रम गरेको गठबन्धनले पूर्वनिधारित कार्यक्रम अनुसार आज प्रदेश १ को विराटनगर र मधेस प्रदेशको जनकपुरमा संयुक्त सभा गर्दैछ। कार्यक्रमलाई सम्बोधन गर्न प्रधानमन्त्री तथा नेपाली कांग्रेसका सभापति शेरबहादुर देउवासहित गठबन्धनमा आबद्ध दलका शीर्षनेताहरु जाँदैछन्।

सभालाई प्रधानमन्त्री देउवा, नेकपा माओवादी केन्द्रका अध्यक्ष पुष्पकमल दाहाल (प्रचण्ड), नेकपा एकीकृत समाजवादीका अध्यक्ष माधवकुमार नेपाल, लोकतान्त्रिक समाजवादी पार्टीका अध्यक्ष महन्थ ठाकुर लगायतका नेताले संवोधन गर्ने कार्यक्रम रहेको छ।

कात्तिक ६ गते भोलि सुदूरपश्चिम प्रदेशको धनगढी र कर्णाली प्रदेशको सुर्खेतमा तथा ७ गते काठमाडौंमा चुनावी सभाको आयोजना गरिएको छ। गठबन्धनले शुक्रबारदेखि प्रदेशमा चुनावी अभियान सुरु गरेको हो । गठबन्धनको संयुक्त चुनावी अभियानपछि दलहरू पार्टीको चुनावी अभियानमा सरिक हुने छन् ।

‘संविधानको रक्षा, स्थिरता र समृद्धिका लागि गठबन्धन’ नारा दिएर गठबन्धनले सबै प्रदेशमा संयुक्त चुनावी सभाको आयोजना गरेको हो।