काठमाडौँ- भारतले चिनियाँ स्मार्टफोन निर्माता कम्पनी भिभोमाथि कर छली गरेको आरोप लगाएको छ ।

भिभोले करबाट जोगिनका लागि अवैधानिक माध्यमले भारतबाट ६ खर्ब २४ अर्ब ७६ करोड भारतीय रुपैयाँ (झण्डै ८ अर्ब अमेरिकी डलर) विदेश लगेको भारतीय पक्षको आरोप छ । यसमध्ये अधिकांश रकम भिभोले चीनतर्फ लगिएको पाइएको छ ।

यो रकम सन् २०१४ यता भारतमा व्यापार थालेदेखि भिभोले आम्दानी गरेको कूल १२ खर्ब ५० अर्ब भारतीय रुपैयाँको झण्डै आधा रहेको जापानी अखबार एसिया निक्केको अनलाइन संस्करणले जनाएको छ ।

यसबारे छानबिन भइरहेको भारतीय सम्पत्ति शुद्धिकरण निवारण निकायले जनाएको छ ।

यसअघि पनि विभिन्न चिनियाँ कम्पनीहरुले कर छली गर्नका लागि भारत तथा अन्य मुलुकहरुबाट अवैध तरिकाले पैसा विदेश लैजाने गरेको आरोप लाग्ने गरेको छ ।