काठमाडौँ– नेपालमा पहिलोपटक ‘अफ्रिकन स्वाइन फिभर’ रोग भेटिएको पुष्टि भएको छ । उच्च मृत्युदर भएको अति खतरनाक महामारीजन्य सरुवा रोग भनिएको यो रोग विगतमा अफ्रिकी महादेशमा मात्र देखिएको थियो ।

सन् २०१८ मा यो रोग चीनमा देखा परेसँगै एसियन मुलुकमा पनि भेटिएको पुष्टि भएको छ ।

काठमाडौंको कागेश्वरी मनोहरा क्षेत्रमा पालिएका बङगुरमा उच्च मृत्युदर देखा परेपछि गत चैतको अन्तिम साता नमुना संकलन गरी परीक्षणका लागि अस्ट्रेलियामा नमूना पठाइएको थियो ।

पशु सेवा विभागले जारी गरेको विज्ञप्तिमा गत जेठ २ गते यो रोग लागेको पुष्टि भएको बताइएको छ ।

पशु सेवा विभागका अनुसार यो रोगले काठमाडौंको कागेश्वरी मनहरा, कीर्तिपुर, चन्द्रागिरी, टोखा र दक्षिणकाली क्षेत्र र ललितपुरको गोदावरी तथा भक्तपुरको चाँगुनारायण क्षेत्रका १ हजार १९ बंगुर मरेका छन् ।

यो रोग पशुबाट मानिसमा भने नसर्ने विभागले जनाएको छ ।

विभागका अनुसार यस रोगबाट संक्रमित भएका सुँगुर प्रजातिमा उच्च जरो आउने, कान, पुच्छर, पेटको तल्लो भागको बाहिरी छाला रातो हुने र शरीरमा निलो धब्बा देखिने, बान्ता गर्ने, छेर्ने जस्ता लक्षण देखिने तथा एकैपटक ठूलो संख्यामा मर्ने गर्छन् ।