पर्सा– नेपाल चेम्बर अफ कमर्सका अध्यक्ष राजेन्द्र मल्लले मुलुकमा तरलताको अभावले अर्थतन्त्रमा शिथिलता देखिएको बताएका छन् ।

सोमबार नेपाल चेम्बर अफ कमर्स तथा वीरगंज उद्योग वाणिज्य संघका पदाधिकारीबीचको अन्तर्क्रियामा चेम्बरका अध्यक्ष मल्लले तरलताको अभावले अर्थतन्त्रमा शिथिलता देखिनुका साथै ब्याजदरमा भएको वृद्धिले लगानीको वातावरणमा ह्रास आएका बताएका हुन् ।

उनले पछिल्लो परिस्थितिका कारण समस्त निजी क्षेत्रले साझा अवधारणा लिएर अगाडि बढ्नुपर्ने पनि बताए ।

अध्यक्ष मल्लले वीरगञ्ज उद्योग वाणिज्य संघ पनि नेपाल चेम्बर अफ कमर्स जस्तै पुरानो सस्था भएको भन्दै व्यावसायिका हक हितका विषयमा एकमत रहनुपर्ने बताए ।

कार्यक्रममा वीरगंज उद्योग वाणिज्य संघका अध्यक्ष डा. सुवोध गुप्ताले व्यवसायीहरूका चुनौतीहरू साझा रहेको भन्दै सामाजिक सुरक्षा र श्रम नीतिले व्यवसायीहरू मारमा परेको बताए ।

कार्यक्रममा चेम्बरका उपाध्यक्ष दीपक श्रेष्ठ, महानिर्देशक कैलाशकुमार बजिमय, वीरगंज उद्योग वाणिज्य संघका वरिष्ठ उपाध्यक्ष अनिल अग्रवाल, उपाध्यक्ष माधव राजपाल, उपाध्यक्ष हरि गौतम, महासचिव मनोजकुमार दास, सहकोषाध्यक्ष प्रेमचन्द गोयललगायतको उपस्थिति थियो ।