काठमाडौँ– कान्सको रेड कार्पेटमा हिँडे यता अभिनेत्री सुरक्षा पन्तको चर्चा बढ्दो छ । 

यिनै सुरक्षा विश्व प्रसिद्ध फेस्टिभलमा आफ्ना प्रिय कलाकारसँग भेटघाट समेत गरिरहेकी छिन् । ‘फ्यान मोमेन्ट’ सेयर गरिरहेकी सुरक्षाले कोरियाका ग्लोबल स्टार लि जुङ जाइसँगको फोटो राख्दै कान्समा एसियाको उपस्थितिलाई माया दर्शाएकी छिन् ।

लि जुङ जाइ कोरियन सिरिज ‘स्क्विड गेम’ का मुख्य कलाकार हुन् ।९० वटा देशमा सबैभन्दा बढी हेरिने रेकर्ड बनाएको कोरियाली यो सिरिजले नेपालमा पनि उस्तै लोकप्रियता पाएको थियो । 

सिरिज रिलिज भएपछि यसलाई लिएर सामाजिक सञ्जालमा समेत विभिन्न बहस भएका थिए । उनी यसपटक आफ्नो निर्देशकीय डेब्यु फिल्म लिएर कान्स पुगेका हुन् । सोही अवसरमा सुरक्षाले सेल्फी लिएकी छिन् । ४९ वर्षीय लि जुङले निर्देशन गरेको स्पाइ थ्रिलर ‘हन्ट’ कान्समा छानिएपछि लि जुङले निर्देशकको रुपमा कान्समा छन् । 

उनको यो फिल्म कान्सको मिडनाइट सेक्सनमा प्रतिस्पर्धी रहेको छ । यस्तै, सुरक्षा बेल्जियन फिल्म ‘दि एइट माउन्टेन्स’ को कलाकारको रुपमा कान्स पुगेकी हुन् ।