एजेन्सी– म्यान्चेष्टर युनाइटेड फुटबल क्लबको म्यानेजरमा एरिक टेक ह्याग नियुक्त भएका छन् ।

युनाइटेडले बिहीबार औपचारिक रूपमा ह्याग टोलीको म्यानेजरमा नियुक्त भएको जानकारी दिएको छ ।

यस सिजनको अन्त्यदेखि जुन २०२५ सम्मका लागि ह्याग र युनाइटेडबीच सम्झौता भएको छ ।

‘विगतको चार वर्षमा एरिकले आयक्समा आफ्नो क्षमता प्रमाणित गर्दै आएका छन् । यसले उनलाई युरोपको नै रोमाञ्चक र सफल प्रशिक्षकका रूपमा पनि स्थापित गरेको छ ।’, युनाइटेडका फुटबल निर्देशकले जोन मुर्टोफले बताए ।

टोलीको आक्रमक खेल शैली र युवाप्रतिको लगावले उनको ख्याती अझैँ बढाएको मुर्टोफको भनाइ छ ।

‘मेरो लागि म्यान्चेष्टर युनाइटेडको म्यानेजरमा नियुक्त हुनु सम्मानजनक क्षण हो । म आगामी चुनौतीको लागि पनि उत्साहित छु ।’, नवनियुक्त म्यानेजर ह्यागले बताए ।

आफूलाई क्लबको इतिहास पनि थाहा भएको, क्लब प्रति समर्थकको मायाबारे अवगत भएको र टोलीले पाउन पर्ने सफलताको लागि काम गर्ने ह्यागले बताए । साथै अयाक्सलाई यस सिजनमा सफलतापूर्वक अन्त्य गर्ने सोचमा भएको पनि ह्यागको भनाइ छ ।