काठमाडौँ– प्रमुख प्रतिपक्षी नेकपा एमालेले महानगरपालिका र उपमहानगरपालिकाका मेयर तथा उपमेयरका उम्मेदवारहरूको निर्णय शनिबार गर्ने भएको छ ।

पार्टी अध्यक्ष केपी ओली निवास बालकोटमा बिहीबार बसेको एमाले सचिवालय बैठकमा प्रदेशबाट सिफारिस भएर आएका नामहरूबारे छलफल भएको र यस विषयमा आगामी बैठकले टुङ्गो लगाउने प्रचार विभाग प्रमुख पृथ्वीसुब्बा गुरुङले जानकारी दिएका छन् ।

उनले सातवटै प्रदेश कमिटीले गरेको सिफारिसका नाममा नै छलफल भएको बताए ।

गुरुङले भरतपुर महानगरबाट विजय सुवेदी, वीरगंजबाट विजय सरागवी र ललितपुरबाट हरिकृष्ण व्यञ्जनकारको नाम मात्र सिफारिस भएको जनाए ।

पोखराबाट १२ जनाको नाम आएको भन्दै उनले गण्डकी र लुम्बिनीमा प्रदेश सांसदलाई मेयर उपमेयरमा टिकट नदिइने पनि उनले बताए ।

गुरुङले शुक्रबार एमालेको कार्यालय तुलसीलाल स्मृति भवनमा उद्घाटन गरिने र घोषणापत्र पनि सार्वजनिक गर्ने जानकारी दिए ।

त्यस्तै शुक्रबार नै १७ जना कम्युनिष्ट नेताहरूलाई एमालेले सम्मान गर्ने जानकारी दिइएको छ ।