काठमाडौँ– मतदाता परिचयपत्र हराकाहरूलाई निर्वाचन आयोगले पुनः परिचय पत्र प्रदान गर्ने भएको छ ।

आयोगले सोमबार सूचना जारी गरी यसअघि पाएको मतदाता परिचय हराएको वा नाशिएको अवस्थामा परिचयपत्र प्रदान गर्ने जनाएको हो ।

आयोगका सहायक प्रवक्ता सूर्यप्रसाद अर्यालले यस अघि मतदाता परिचय पत्र पाई हराएको, नाशिएको वा अन्य कुनै तवरले आफूसँग नरहेको अवस्थामा मतदातालाई निवेदन दिन सकिने व्यवस्था गरिएको जनाए ।

प्रतिलिपि परिचयपत्रका लागि आफ्नो वडा कार्यालयको सिफारिससहित निर्वाचन कार्यालयमा फागुन २० गतेभित्र निवेदन दिन सकिने व्यवस्था मिलाइएको पनि उनले जनाए ।

त्यस्तै, आयोगले मतदाता नामावलीमा भएको विवरणमा कुनै त्रुटि भए इमेल र फ्याक्सबाट समेत निवेदन दिन सकिने व्यवस्था मिलाएको जनाएको छ ।

आयोगले फागनु ५ को निर्णयअनुसार सवै निर्वाचन कार्यालयलाई परिपत्र गरी इमेल र फ्याक्सबाट समेत उक्त निवेदन लिन सकिने गरी निर्देशन दिइएको जनाएको छ ।