काठमाडौँ– बेलायती प्रधानमन्त्री लिज ट्रसले पदबाट राजीनामा दिएकी छिन् । बेलायती प्रधानमन्त्री कार्यालय १० डाउनिङ स्ट्रिटमा सम्बोधन गर्दै प्रधानमन्त्री ट्रसले पदबाट राजीनामा दिएको घोषणा गरेकी हुन् ।

पछिल्ला केही दिनयता आफ्नै पार्टी र मन्त्रिपरिषद्का सदस्यहरूले उनको नेतृत्व प्रति असन्तोष व्यक्त गर्दै आएका थिए । बुधबार मात्रै बेलायती गृहमन्त्री सुएला ब्रेभरम्यानले राजीनामा दिएकी थिइन् ।

४५ दिनअघि प्रधानमन्त्री बनेकी ट्रसले आफ्नो राजीनामाबारे राजा चार्ल्स तृतीयलाई जानकारी गराएको बताएकी छिन् । बेलायतको सत्तारुढ कन्जरभेटिभ पार्टीले यसै साता नयाँ प्रधानमन्त्री चयन गर्ने अपेक्षा गरिएको छ ।

नयाँ प्रधानमन्त्री चयन नभएसम्मका लागि ट्रसले नै बेलायती प्रधानमन्त्रीको जिम्मेवारी सम्हाल्ने बीबीसीले जनाएको छ ।