काठमाडौँ– नेकपा एमालेका उपाध्यक्ष सुवासचन्द्र नेम्वाङले चुनावमा अध्यक्ष केपीशर्मा ओलीको बाकस खाली गर्न नेकपा एकीकृत समाजवादीका नेता झलनाथ खनाललाई चुनौती दिएका छन् ।

आइतबार इलाममा उपाध्यक्ष नेम्वाङले नेता खनालको अभिव्यक्तिको प्रतिउत्तरमा यस्तो भनेका हुन् ।

शनिबार भएको एक कार्यक्रममा नेता खनालले चुनावमा ओलीको बाकस शून्यमा मत हुनुपर्ने टिप्पणी गरेका थिए ।

यही टिप्पणीलाई लक्षित गरी नेम्वाङले खनालकै निर्वाचन क्षेत्रमा पुगेर मतपेटिका खाली गर्न चुनौती दिएका हुन् ।

उनले खनालको क्षेत्रमा एमालेमा जनसागर उर्लिएको दाबी पनि गरे ।

नेम्वाङले खनालप्रति कटाक्ष गर्दै भने, ‘इलाममा मात्र होइन, मेची महाकाली, तराई–मधेसदेखि हिमालसम्म मानिसहरूको जुन ओइरो एमालेमा प्रवेश गरिरहेको छ । त्यो देखेर छक्क परिरहनुभएको होला हाम्रा मित्रहरू’, पार्टी अध्यक्ष ओलीलाई छेउमा राखेर नेम्वाङले भने, ‘मैलै नाम चाहिँ बिर्सें । उहिलेदेखिको साथी, झलझली अनुहार याद आउँछ । कमरेड जन्तरे हो कि अन्तरे हो नाम चाहिँ थाहा छैन ।’