काठमाडौं– प्रिन्ट गर्ने कागज आयात गर्न विदेशी मुद्राको अभाव भएपछि श्रीलंकामा परीक्षा नै स्थगित गरिएको छ । सोमबारबाट शुरु हुने भनिएको परीक्षा प्रिन्ट गर्ने कागजको गम्भीर अभाव भएपछि विद्यालयस्तरीय परीक्षा अनिश्चितकालसम्मका लागि स्थगित गरिएको हो ।

यसबाट श्रीलंकाका ४५ लाखमध्ये दुई तिहाइ वा करिब ३० लाख विद्यार्थी प्रभावित हुने सरकारी अधिकारीलाई उद्धृत गर्दै अन्तर्राष्ट्रिय सञ्चारमाध्यमले जनाएका छन् ।

‘प्रिन्टरहरुले विदेशी मुद्राको अभावमा कागज र मसी आयात गर्न नसक्ने भएपछि विद्यालयका प्रधानाध्यापकहरू पनि परीक्षा आयोजना गर्न सक्ने अवस्थामा छैनन् ।’ पश्चिमी प्रान्तको शिक्षा विभागले जनाएको छ ।

विदेशी मुद्राको अभावका कारण श्रीलंकामा कागज र मसीमात्र नभई खाद्यान्न, इन्धन र औषधिजस्तो अत्यावश्यक वस्तुको पनि अभाव रहेको बताइएको छ । सन् १९४८ मा स्वतन्त्रता पाएयताकै सबैभन्दा खराब आर्थिक संकट झेलिरहेको श्रीलंकाले यसै वर्ष झण्डै ७ अर्ब अमेरिकी डलर विदेशी ऋण तिर्नुपर्ने छ ।

यद्यपि फेब्रुअरी महिनाको अन्त्यसम्म त्यहाँ केबल २ अर्ब ३० करोड अमेरिकी डलर बराबर मात्रै विदेशी मुद्राको सञ्चिती रहेको बताइएको छ ।