काठमाडौँ– नेपाली काँग्रेसका केन्द्रीय सदस्य नैनसिंह महरले प्रजातन्त्रको खोल ओढेका कम्युनिष्टबाट नै प्रजातन्त्रमाथि सबैभन्दा बढी खतरा रहेको बताएका छन् ।

प्रजातन्त्र दिवसका अवसरमा स्कूल अफ डेमोक्रेसी त्रिभुवन विश्वविद्यालय समितिद्वारा गरिएको ‘विश्वमा प्रजातन्त्रको अभ्यास र नेपालको अवस्था’ विषयक विचार गोष्ठीमा महरले यस्तो बताएका हुन् ।

ओली नेतृत्वको तीनवर्षे सरकारतर्फ इङ्गित गर्दै उनले समाजको आवश्यकतालाई वास्ता नगरी प्रजातन्त्रको आवरणमा स्थापित भएर खाली बहुमत र अल्पमतको कुरा गर्ने र कर्म भने प्रजातन्त्रका मुख्य मूल्य मान्यताविरुद्ध गर्नेलाई समयमै चिन्नुपर्ने बताए ।

अमेरिकी सहयोग परियोजना एमसीसीका विरोधीहरूप्रति कटाक्ष गर्दै नेता महरले त्रिवि विश्वविद्यालय र त्रिभुवन अन्तर्राष्ट्रिय विमानस्थल बनाउने बेला नेपालमा तत्कालीन समयमा भएका २०/२५ जना कम्युनिष्टहरूले विदेशीहरू आउने भन्दै सुतेको प्रसंग सुनाएका थिए ।