पोखरा- पोखरा महानगरपालिकाले पनि काठमाडौँ महानगरमा जस्तै होटेल, रेष्टुरेण्ट तथा विभिन्न संघ संस्थाका शौचालयलाई सार्वजनिक रूपमा प्रयोग गर्न मिल्ने गरी खुला गर्न आह्वान गरेको छ ।

मुख्य सहरी क्षेत्रमा सार्वजनिक शौचालय नहुँदा र शौचालय निर्माणका लागि जग्गा पनि नहुँदा सर्वसाधारणलाई असहजता भएको छ । त्यसैले मुख्य सहर र सडकमा रहेका व्यक्ति, बैंक, वित्तीय संस्था, होटेल, रेष्टुरेण्टलगायत संस्थाका व्यावसायिक, गैरव्यवसायिक र पेसागत संस्था तथा कम्पनीका शौचालय महानगरले सर्वसाधारणका लागि खुला गर्ने तयारी गरेको छ । त्यसका लागि आवश्यक सफाइ र स्यानिटरी सामग्रीमा महानगरले सहयोग गर्ने, विशेष लोगो र पहिचानयुक्त संकेत राख्ने छ ।

यसअघि महानगरको कार्यपालिका बैठकबाटै उक्त निर्णय भएको थियो । इच्छुक संस्थाले साउन मसान्तभित्र आफ्नो विवरण पेस गर्नुपर्ने छ । सहयोग गर्ने संस्था वा कम्पनीको विवरण वेभ साइटमा राख्ने, महानगरबाट उपलब्ध सेवा सुविधामा प्राथमिकता दिने मेयर धनराज आचार्यले बताए । योसँगै चालू आर्थिक वर्षदेखि महानगरले सार्वजनिक शौचालय निर्माणमा विशेष चासो दिएको छ ।