काठमाडौँ- नेकपा एमालेका उपमहासचिव प्रदीप ज्ञवालीले राज्य डरलाग्दो गरी बिचौलियाको नियन्त्रणमा जान थालेको आरोप लगाएका छन्।

काठमाडौँमा नेकपा एमालेको उपभोक्ता हित संरक्षण तथा सुशासन विभागले आयोजना गरेको कार्यक्रममा ज्ञवालीले राजनीतिक गठबन्धनको आवरणमा खतरनाक वित्तीय गठबन्धन भइरहेको र यसले मुलुकलाई डरलाग्दो अवस्थामा पुर्‍याएको बताए।

उनले वर्तमान सरकारको एक वर्ष देशको बबार्दीको वर्ष भएको तर्क गरे। सरकारले भ्रष्टाचार, कालाबजारीया र कमिसन तन्त्रलाई संरक्षण गरिरहेको उनको भनाइ छ । त्यस्तै ज्ञवालीले कालो धनलाई सेतो बनाउने प्रयासहरू नै गभर्नरमाथिको हमला भएको टिप्पणी गरे ।

गभर्नरलाई हटाउने यसअघिको प्रयास सफल नभएपछि अहिले विवाद निकाल्ने काम भएको उनको भनाइ छ । उनले सरकारकै कारण अहिले सबैभन्दा ठूलो समस्या उपभोक्तालाई परिरहेको बताए।

उनले अहिले मुलुकको प्रमुख आर्थिक सूचकहरू हेर्दा मुलुक अझै अप्ठेरोमा जाने देखिएको धारणा राखे।