रुपन्देही– रुपन्देहीको सैनामैना–मुर्गियाबाट अपहरणमा परेका दुई बालबालिकाको उद्धार गरिएको छ । बिहीबार विद्यालय गइरहेका बेला एकै परिवारका दुई बालबालिका अपहरणमा परेका थिए । उनीहरूलाई प्रहरीले शुक्रबार झापाको काँकडभिट्टाबाट सकुशल उद्धार गरेको हो ।

प्रहरीले अपहरणमा संलग्न खिमबहादुर पौडेललाई पनि पक्राउ गरेको जिल्ला प्रहरी कार्यालय रुपन्देहीले जनाएको छ ।

उद्धारपछि बालबालिकालाई आफन्तको जिम्मा लगाएको रुपन्देहीका प्रहरी नायव उपरीक्षक नवरत्न पौडेलले जनाएका छन् ।

अपहरणको कारणबारे भने अनुसन्धानपछि मात्रै थाहा हुने पौडेलले बताए । सैनमैना नगरपालिका–६ बस्ने पुष्पा दाहालकी छोरी १२ वर्षीया प्रसिद्ध दाहाल र छोरा ९ वर्षीय प्रसन्न दाहाल अपहरणमा परेका थिए ।

बिहीबार सैनामैना–४ स्थित स्कूलमा अध्ययनका लागि गएकी बालबालिका साँझसम्म पनि घर नआएपछि परिवारले इलाका प्रहरी कार्यालय रन्यौरामा निवेदन दिएको थियो ।

ती बालबालिका पढ्ने प्रभात आवसीय बोर्डिङ स्कूलका प्रधानाध्यापक अनन्तराम शर्माले बालबालिका स्कूल नआएको बताएका थिए । परिवारले स्कूलबाट घर नआएको खबर थाहा पाएपछि स्टाफ, बस चालक र सहचालकलाई सोध्दा दुई विद्यार्थीको आफन्तले फोटो खिचाउन लैजान्छु भनेर मुर्गिया झारेको भन्ने सूचना पाएको बताए ।