लमजुङ- राइनास नगरपालिका वडा नम्बर ३ का महिलाहरूले सिलाई कटाई सम्बन्धी सिपसँगै अनुदानमा प्रविधि समेत पाएका छन् ।

राइनास नगरपालिकाले गरिबी निवारणका लागि लघु उद्यम विकास कार्यक्रम (मेड्पा) अन्तर्गत वडा नम्बर ३ का १२ जना महिलाहरूलाई सिलाई कटाई तालिमसँग सिलाई मेसिन प्रदान गरेको हो ।

एक महिना सम्म सञ्चालन भएको उक्त तालिमको समापनका अवसरमा तालिम लिएका महिलाहरूलाई ५० प्रतिशत अनुदानमा सिलाई मेसिन हस्तान्तरण गरिएको हो ।

सिप सिकेर व्यवसाय गर्न चाहने तथा आयआर्जनमा जोडिन चाहने महिलाहरूलाई सिपमूलक तालिम प्रदान गरिएको राइनास नगरपालिकाका मेड्पा कार्यक्रम संयोजक राधिका पन्तले बताइन् ।

तालिम पश्चात् १३ हजार ४ सय पर्ने सिलाई मेसिन महिलाहरूलाई ५० प्रतिशत अनुदानमा प्रदान गरिएको हो । यसवर्ष नगरपालिकाको वडा नं. ३, ४ र ७ मा गरिवी निवारणका लागि लघु उद्यम विकास कार्यक्रम सञ्चालन भएको छ ।

कार्यक्रम अन्तर्गत सिलाई बुनाई, मुढा बनाउने, डलकुसन बनाउने, हाउस वाइरिङ र ब्याग बनाउने तालिम सञ्चालन गरिएको हो ।

८० जना उद्यमी सृजना गर्ने लक्ष्यका साथ सञ्चालन भएको उक्त कार्यक्रम अन्तर्गत सिपमूलक तालिमका लागि ८ लाख र प्रविधि हस्तान्तरणका लागि साँढे तिन लाख बजेट आएको मेड्पा कार्यक्रम संयोजक पन्तले बताइन्।