काठमाडौँ– आफ्नै अनुयायीलाई करणी गरेको आरोप लागेका कृष्णबहादुर गिरी (सिद्धबाबा) लाई सफाइ दिने फैसला उच्च अदालत विराटनगरले बदर गरेको छ ।

मंगलबार उच्च अदालत विराटनगरका कामु मुख्यन्यायाधीश सत्यमोहन जोशी थारु र न्यायाधीश किरणकुमारी गुप्ताको संयुक्त इजलासले यस्तो फैसला सुनाएको हो ।

जिल्ला अदालत सुनसरीबाट उनलाई सफाइ दिइएको फैसलालाई बदर गर्दै पुनः प्रमाण हेरेर पुनः फैसला गर्न आदेश दिएको हो ।

वि.सं. २०७७ मंसिर २२ गते सिद्दबाबालाई जिल्ला अदालत सुनसरीले सफाइ दिएको थियो । जिल्ला अदालत सुनसरीका तत्कालीन न्यायाधीश अर्जुनप्रसाद कोइरालाको इजलासले उनलाई सहमतिमा भएको यौन सम्पर्कलाई बलात्कार भन्न नमिल्ने भन्दै फैसला सुनाएको थियो ।

जिल्ला अदालतको यो फैसलापछि पीडित महिला उच्च अदालत गएकी थिइन् ।

पीडित महिलाले २०७६ कार्तिक ४ गते सिद्दबाबाले आफूलाई बलात्कार गरेको भन्दै उजुरी दिएकी थिइन् । उनले आफूले गुरु मानेका सिद्दबाबाले राति बलात्कार गरेको दाबी गरेकी थिइन् ।