काठमाडौँ– अभिनेता निखिल उप्रेतीले पाएको अर्को उपनाम हो, एक्सन स्टार । 

उनले डेब्यु फिल्ममै सात तल्ले भवनबाट जम्प गरेपछि नेपाली फिल्मका दर्शक माझ परिचित बने । किनकी त्यो समयमा अहिलेको जस्तो सेफ्टी युज हुन्थेन । अनि जे हुन्थ्यो, आफ्नै  रिक्समा गरिन्थ्यो । त्यसपछि उनलाई दर्शकले  ‘एक्सन हिरो’ भन्न थाले । दर्शकले एक्सन मन पराएपछि मात्र होइन नेपाली फिल्मको एक्सनमा नयाँ ट्रेन्ड ल्याएपछि उनलाई मिडियामा ‘एक्सन स्टार’ भन्न थालियो । उनका फिल्ममा एक्सनको नयाँपन हुने भएकाले दर्शक प्रतीक्षित हुन् थाले । उनले नेपाली फिल्ममा एक्सन शैलीलाई मात्र परिवर्तन गरेनन्, उनी पछाडि आउने एक्टरहरुले उनलाई नै पछ्याए ।

लामो समय नेपाली फिल्ममा ‘अनुहार बिक्ने हिरो’ को रुपमा समेत चिनिएका निखिल अहिले फेरिएका छन् । उनको जीवनशैली नै फेरिएको छ । रूप, पहिरन, लगाउने पोसाक र खाने खानासँगै जीवनशैलीमै उनले परिवर्तन ल्याएका हुन् । उनलाई एक्सनस्टार भन्नेहरू सम्बोधी प्रवचक भन्न थालेका छन् । उनी देवालय पुग्छन् । प्रवचन दिन्छन् । उनका दर्शकश्रोता फेरिएका छन् । अहिले उनलाई अभिनेतासँगै प्रवचकका रुपमा चिन्नेको संख्या बढ्दै छ । सँधै हिरो भनेर गरिने सम्बोधनमा पनि परिवर्तन आएको छ । प्रवचकको रूपमा निमन्त्रणा आउँछ । उनी नहिच्किचाई जान्छन्’ प्रवचन दिन्छन् ।

किनकी पछिल्लो समय निखिल फिल्मभन्दा पनि अध्यात्मतर्फ लागेका छन् । सफाचट व्यक्तित्व बनाएका निखिल पछिल्लो समय लामो दाह्री र कपालमा प्रस्तुत छन् । उनले फिल्मभन्दा पनि अध्यात्मतर्फ आफूलाई मोडेका छन् । आज जन्मदिन परेका निखिलले एक तस्बिर सार्वजनिक गरेका छन् । उनले आफू २/३ वर्षको हुँदा र अहिलेको तस्विर सामाजिक सञ्जाल मार्फत सार्वजनिक गरेका छन् । तस्बिरमा निखिलसँगै उनका पिता र माता छिन् । 

आफ्नो लागि जन्मदिन पनि अन्य दिन झैँ रहेको निखिलले बताए । ‘मेरो लागि अन्य दिन दिन झैँ यो सामान्य दिन हो । आज मैले सामाजिक सञ्जालमा सेयर गरेको तस्बिरले पनि समय यात्रालाई जनाउँछ’ उनले भने । आफ्नो जन्मदिनमा केही ‘नोस्टाल्जिक’ भएका निखिलले यस दिनमा जीवन के हो प्रश्नले झ्झ्क्याउने बताए । ‘मेरो उद्देश्य फिल्ममा सुपरस्टार बन्नु होइन । मैले गरेको कर्मले दिएको फल हो त्यो सब । मलाई आजको दिनमा मैले जीवनलाई कति बुझे भन्ने प्रश्नले सताउने गर्छु’ निखिलले भने ।

जीवनमा जीवनको महत्व बुझेर मात्र यात्रा समाप्त गर्ने उनको चाहना छ । ‘समय यात्रामा आफ्नो महत्वसँगै उपस्थिति बुझ्ने सके मात्र जीवन सार्थक हुन्छ’ उनले भने ।