काठमाडौं– लडाकु समूहबाट हुने आतंककारी आक्रमणको जोखिम मोल्दै सन् २०१९ अगष्टमा धारा ३७० हटेयता ठूलो सङ्ख्यामा कश्मीरी पण्डितहरू कश्मीर फर्किन थालेका छन् ।

डेक्कन हेराल्डका अनुसार त्यसयता हालसम्म २ हजार १ सय भन्दा धेरै कश्मीरी पण्डितहरू कश्मीर फर्केका छन् । सन् १९९० मा द्वन्द्व चर्किएसँगै ५५ हजार जति कश्मीरी पण्डितहरू पलायन भएर जम्मु लगायत मुलुकका अन्य भूभाग पुगेका थिए ।

सरकारी तथ्यांकअनुसार सन् २०२०–२१ मा ८४१ जना र सन् २०२१–२२ मा १ हजार २ सय ६४ कश्मीरी पण्डितले कश्मीर फर्किन आवेदन दिएका थिए ।

प्रधानमन्त्रीको विकास प्याकेजअनुसार कश्मीरी पण्डितहरूलाई कश्मीर फर्किनका लागि प्रोत्साहन गर्नका निम्ति ३ हजार सरकारी कोटा पनि निर्धारण गरिएको छ । तीमध्ये २ हजार ८ सय २८ जनाको आवेदन प्रक्रिया पूरा भएको डेक्कन हेराल्डले जनाएको छ ।