काठमाडौँ– एनसेल आजियाटा लिमिटेडले फागु पूर्णिमाको अवसरमा मोबाइल डेटा सस्तो बनाउँदै ‘गज्जबको दैनिक जीबी प्याक’अन्तर्गत नयाँ डेटा प्याकहरू ल्याएको छ ।

यसका साथै कम्पनीले दैनिक जीबी डेटा प्याकअन्तर्गत सञ्चालनमा रहेका प्याकहरूमा पनि भोल्युम बढाएको छ ।

ग्राहकले बुधबारबाट करसहित १२९ रुपैयाँमा ७ जीबी अल टाइम डेटा प्याक लिँदै ७ दिनसम्म १–१ जीबी डेटा प्रयोग गर्न सक्ने कम्पनीले जनाएको छ ।

त्यसैगरी १४ जीबी अल टाइम डाटा प्याक १९९ रुपैयाँमा लिएर ७ दिनसम्म दैनिक २ जीबी डेटा प्रयोग गर्न सकिनेछ ।

यी दुई दैनिक जीबी डेटा प्याक बाहेक एनसेलले पहिला नै सञ्चालनमा रहेका डेटा प्याकहरूमा भोल्युम पनि बढाएको छ ।

यसअन्तर्गत ग्राहकहरूले पहिलेकै मुल्यमा थप भोल्युमसहितको डेटा प्याक लिन सक्छन् ।

भोल्युम बढाइएको डेटा प्याकअन्तर्गत ग्राहकले १६९ मा १०.५ जीबी डेटा खरिद गरी दैनिक १.५ जीबी डेटा ७ दिनसम्म प्रयोग गर्न सक्ने छन् ।

त्यस्तै, २६९ रुपैयाँमा २१ जीबी डेटा हरेक दिन ३ जीबीका दरले ७ दिनसम्म प्रयोग पाउने कम्पनीले जनाएको छ ।

त्यसैगरी, अब ५९९ रुपैयाँमा ४२ जीबी डेटाको फाइदा लिन सकिनेछ । जसअन्तर्गत हरेक दिन २८ दिनसम्म १.५ जीबी डेटा प्रयोग गर्न पाउने कम्पनीले जनाएको छ ।

प्रिपेड ग्राहकले एष्ट्रिक्स १७१२३ एष्ट्रिक्स १ ह्यास डायल गरी प्राप्त निर्देशनअनुसार यी सेवाहरू प्राप्त गर्न सक्ने कम्पनीले जनाएको छ ।