काठमाडौँ– नियम विपरित रात्री सो सञ्चालन गरेको तथा टिकट दर नै नराखी टिकट बिक्री गरेको थाहा पाएपछि चलचित्र विकास बोर्डले काठमाडौँका तीन ठूला हललाई कारबाही प्रक्रिया अगाडि बढाएको छ ।

चलचित्र विकास बोर्डले शुक्रबार राजस्व अनुसन्धान विभाग तथा जिल्ला प्रशासन कार्यलयलाई पत्र लेख्दै तीनै हलमाथि छानबिन गरी कारबाही प्रक्रिया अगाडि बढाउन अनुरोध गरेको हो ।

बोर्डका अध्यक्ष दयाराम दाहालले बिग मुभिजले अनुमतिबिना बिहानैदेखि सो सञ्चालन गरेको र एफक्युबले टिकट दर नै नराखी टिकट बिक्री गरेको उजुरीका आधारमा कारबाहीका लागि राजस्वलाई अनुरोध गर्ने निर्णय गरेको जानकारी गराए ।

‘अतिरिक्त सो सञ्चालन गर्नुअघि बोर्डसँग स्वीकृति लिनुपर्ने नियम छ जुन हलले पूरा गरेको पाइएन । यसैगरी केही हलले राजस्व छल्ने मनसायले टिकट दर नै प्रिन्ट नगरी पनि टिकट बेचेको पाइयो । यसलाई हामीले गम्भीर रुपमा लिँदै राजस्व र जिल्ला प्रशासन कार्यालयलाई जानकारी गराएका हौँ,’ बोर्ड अध्यक्ष दाहालले बताए ।

हलहरूले बारम्बार नियम मिचेपछि विकास बोर्डले अनुगमन गरेर कारबाही सिफारिस गरेको हो । पहिलोपल्ट बोर्डले राजधानीका ठूला हलविरुद्ध ‘एक्सन’ लिन लागेको हो । कर छली गरेको पाइएमा राजस्वले हल बन्द गर्ने , सामान जफत गर्ने र ५ लाख बराबरको जरिवाना तिराउन सक्ने पनि व्यवस्था छ ।

बिहीबारदेखि नेपालमा प्रदर्शन भएको डब फिल्म ‘केजीएफ २’ राजधानीका धेरै हलले दर्शकको माग भन्दै मध्यरात १ बजेदेखि देखाएका थिए । यो क्रममा बोर्डलाई पूर्व जानकारी गराई अनुमति लिनु पर्नेमा सो नलिईकन फिल्म देखाएकाले विकास बोर्ड अनुगमनमा सक्रिय भएको हो ।