काठमाडौं– नेपाल र चीनबीच रसुवागढी–केरुङ नाकामा दुईतर्फी व्यापार सञ्चालन गर्ने सहमति भएको छ ।

नेपाल–चीन सीमासम्बन्धी परामर्श बैठकले उक्त नाकाबाट साम्रगी आयात र निर्यात गर्न सहमति जुटाएको हो । यसअघि चीनले कोरोना भाइरसको कारण देखाउँदै अघोषित रुपमा नाका बन्द गरेको थियो ।

सीमा नाकाबाट आयात र निर्यात गर्न सहमत भए पनि कोरोना भाइरस मापदण्ड भने पूर्ण रुपमा पालना गर्नुपर्ने छ ।

चीनले पछिल्लो समय नेपालमा सीमित मात्रामा कन्टेनर पठाउँदै आएको थियो भने नेपालबाट निर्यात गर्न दिएको थिएन ।

चीनको यो कदमले नेपाली व्यापारीहरु रुष्ट हुँदै आएका थिए भने उनीहरुले आफ्नो ठूलो लगानी फसेको भन्दै नेपाल सरकारलाई सहमति जुटाइदिन आग्रह गर्दै अएका थिए । तर, चीनले यसबारेमा चासो देखाएको थिएन ।

बिहीवार भएको भर्चुअल बैठकमा रसुवागढी–केरुङ नाकाका साथै हुम्लाको हिल्सा–पुराङ सीमा बन्दरगाह खोल्ने निर्णयमा सहमति भएको हो ।

‘नेपाल–चीन सीमा परामर्श बैठक’मा परराष्ट्र मन्त्रालय, गृह मन्त्रालय, नापी विभाग, बेइजिङस्थित नेपाली राजदूतावासका कार्यवाहक र ल्हासास्थित नेपाली महावाणिज्य दूतको सहभागिता रहेको थियो ।

चिनियाँ प्रतिनिधिमण्डलमा परराष्ट्र मन्त्रालय र चीनका विभिन्न मन्त्रालयका वरिष्ठ अधिकारीहरू, चीनको तिब्बत स्वायत्त क्षेत्रका विदेश मामिला कार्यालय र अन्य विभागहरू तथा काठमाडौंस्थित चीनको राजदूतावासका कार्यवाहकहरू सहभागी थिए ।