काठमाडौँ– पूर्वप्रधानमन्त्री एवम् नेकपा एमालेका अध्यक्ष केपीशर्मा ओलीले विश्व स्काउट संगठन एशिया प्रशान्त क्षेत्रको ठूलो ‘मेधावी योगदान पदक’ प्राप्त गरेका छन् ।

बिहीबार काठमाडौँमा भएको समारोहमा राष्ट्रपति विद्यादेवी भण्डारीले पूर्वप्रधानमन्त्री ओलीलाईे ‘मेधावी योगदान पदक’ बाट प्रदान गरेकी हुन् ।

अध्यक्ष ओलीले प्रधानमन्त्री रहँदा नेपाल स्काउटको अभियान विकास, विस्तार र प्रबद्र्धनमार्फत् बालबालिका तथा युवाको सर्वपक्षीय विकासमा गरेको योगदानको कदर गर्दै यो पदक प्रदान गरिएको हो ।

समारोहमा राष्ट्रपति भण्डारीले शान्तिपूर्ण राजनीतिक यात्राका क्रममा लामो जेल जीवन बिताएर मुलुकका लागि पूर्वप्रधानमन्त्री ओलीले दिएको योगदानप्रति ‘मेधावी योगदान पदक’ ले गौरव प्रदान गर्ने बताइन् ।

त्यस्तै, पूर्वप्रधानमन्त्री ओलीले मानव कल्याणका लागि अझै गतिशील र सङ्गठित हुन स्काउटलाई आग्रह गर्दै चारित्रिक र नैतिक हिसाबले आदर्शवान समाज निर्माणमा अग्रसर हुनुपर्ने बताएका थिए ।

नेपाल स्काउटका राष्ट्रिय संयोजक लोकबहादुर भण्डारीका अनुसार ओली यो पदक प्राप्त गर्ने पहिलो नेपाली बनेका छन् ।