काठमाडौँ- नेपाली कांग्रेसका वरिष्ठ नेता रामचन्द्र पौडेलले संसद र प्रतिनिधिसभा नचाहिएको दललाई संसदमा वा प्रतिनिधिसभामा पठाउनुको कुनै औचित्य नरहेको बताएका छन् । नेकपा एमालेले पटक पटक संसद भंग गरेर संविधानको चीर हरण गरेको बताउँदै पौडेलले त्यस्तो पार्टीलाई फेरी पनि संसदमा पठाउनु ठूलो भूल हुने बताएका हुन् ।

आइतबार लमजुङको मध्यनेपाल नगरपालिका वडा नम्बर २, सोतिपसलमा आयोजित चुनावी सभालाई सम्बोधन गर्दै यस्तो टिप्पणी गरेका हुन् । पाँच दलीय गठबन्धनका केन्द्रीय निर्वाचन परिचालन संयोजकसमेत रहेका नेता पौडेलले एमालेतर्फ लक्षित गर्दै आफूले पाएको बहुमतको दम्भ देखाएर पटक पटक संविधानको उल्लंघन गर्ने र संसद विघटन गरेर देशलाई अराजकतातर्फ धकेल्ने काम गरेकोले त्यसको विरुद्धमा सबै एकजुट हुनुपर्ने समय आएको बताए ।

नेता पौडेलले अहिलेको अवस्थामा एउटै मात्र पार्टीेको बहुमत हुने अवस्था नभएकोले लोकतान्त्रिक वाम गठबन्धन गरेर आएको बताए । देश र संविधान रक्षा गर्नुपर्छ भन्ने शक्ति एक भएर यस्ता लोकतन्त्र विरोधी शक्तिलाई परास्त गर्नुको विकल्प नभएको उल्लेख गरे । उनले भविष्यमा पनि मिलीजुली सरकार गठन गर्नुपर्ने अवस्था रहेकोमा अहिले नै मिलेर चुनाव लडेको उल्लेख गरे । उनले पाँच दलीय गठबन्धनको साझा एजेण्डा भनेको संविधानको रक्षा गर्नु र देशमा परिवर्तन ल्याएको बताए ।

संविधान राष्ट्रको साझा सहमतिको दस्ताबेज भएको उल्लेख गर्दै संविधान बनेपछि त्यसबाट प्राप्त उपलब्धीलाई बचाउनुको साटो नेकपा एमालेले संविधान मिचेर काम गरेकोले त्यस्ता पार्टी र प्रतिनिधिलाई गाउँ गाउँ र जिल्ला जिल्लाबाट परास्त गर्नु आवश्यक रहेको बताए । पटकपटकको परीक्षण नेपाल जस्तो देशले धान्न नसक्ने हुँदा राष्ट्रिय रूपमास्थिरता कायम गरेर उन्नती गर्न पाउनु पर्ने पाँचदलीय गठबन्धनको मुख्य उद्देश्य रहेको उनको भनाइ छ ।

गाउँमै उद्योग व्यवसाय, पर्यटनको विकास, उद्योग धन्दाको विस्तार, गाउँमै रोजगारी र आम्दानीका अवसर खोज्नु पर्ने मुख्य ध्येय रहेकोले सोही अनुसार काम गर्न गठबन्धनलाई जिताउनु पर्ने उनको धारणा थियो । त्यसको लागि लमजुङबाट गठबन्धनको तर्फबाट प्रतिनिधि सभातर्फ माओवादी केन्द्रका देवप्रसाद गुरुङ र प्रदेश सभा क मा नेपाली कांग्रेसका डा. टकराज गुरुङ र प्रदेश सभा ख मा नेपाली कांग्रेसका भेषबहादुर पौडेललाई विजयी गराउन आग्रहसमेत गरे ।

नेता पौडेलले सबैलाई सुशासन चाहिएको भन्दै सुशासनको लागि गठबन्धन दृढ रहेको बताए । नेपाली कांग्रेसका वरिष्ठ नेता पौडेल तनहूँ १ बाट प्रतिनिधि सभा उम्मेदवारसमेत हुन् । उक्त चुनावी सभामा लमजुङबाट नेपाली कांग्रेसका दीलबहादुर घर्ती, प्रतिनिधि सभाका उमेदवार देवप्रसाद गुरुङ, प्रदेश सभाका उमेदवारहरु डा. टकराज गुरुङ र भेषबहादुर पौडेलले देशले लामो समयपछि प्राप्त गरेको संविधानको रक्षा र सुशासनको लागि पाँच दलीय गठनबन्धनलाई जिताएर पठाउनुको विकल्प अब नरहेको बताएका थिए ।