काठमाडौँ – नेपाली कांग्रेसका नेता शेखर कोइरालाले आफू पक्षीय नेताहरुको बैठक बोलाएका छन् ।

पार्टी सभापतिसमेत रहेका प्रधानमन्त्री शेरबहादुर देउवाले एकलौटी निर्णय गरिरहेको भन्दै कोइराला समूह छुट्टै बैठक बस्न लागेको हो।

देउवाले पार्टीभित्र कुनै सल्लाह नगरेर अघि बढेको भन्दै कोइराला समूहले आज दिउँसो बैठक बोलाएको छ । बैठकमा देउवाविरुद्धको रणनीति तय गर्ने तयारी छ । बैठकमा आफू निकटका पदाधिकारी, नेता तथा केन्द्रीय सदस्यलाई बोलाइएको कोइराला निकट एक नेताले जानकारी दिएका छन् ।

देउवाले नेविसंघ, महिला संघ, तरुण दल, किसान संघ र आदिवासी जनजाति महासंघमा नयाँ नेतृत्व चयन गर्दा आफ्नो समूहलाई नसमेटेको भन्दै कोइराला पक्षले असन्तुष्टि जनाउँदै आएको छ ।

चुनावी रणनीतिका सन्दर्भमा पनि कोइराला समूहको बैठकमा छलफल हुने बताइएको छ ।