काठमाडौं– शुक्रबार देशभर एकसाथ स्थानीय तहको निर्वाचनमा मतदान हुँदैछ। राजधानीसमेत रहेको काठमाडौं महानगरपालिकाको मतदानलाई धेरैले महत्वका साथ हेरेका छन्।

काठमाडौं महानगर प्रमुख पदका उम्मेदवारले कहाँकहाँबाट मतदान गर्दैछन् भन्ने महत्वपूर्ण विषय बनेको छ। सत्तारुढ गठबन्धनबाट उम्मेदवारी दिएकी सिर्जना सिंहले वडा नम्बर १६ स्थित युवक माविबाट मतदान गर्दैछिन्।

एमालेका तर्फबाट प्रमुख पदको उम्मेदवारी दिएका केशव स्थापितले वडा नम्बर २८ स्थित पद्यकन्या क्याम्पस केन्द्रबाट मतदान गर्दैछन्।

विवेकशील साझाबाट प्रमुखको उम्मेदवारी दिएकी समीक्षा बाँस्कोटाले वडा नम्बर ३१ स्थित भ्याली भ्यू मतदान केन्द्रमा पुगेर मतदान गर्दैछिन्।

काठमाडौं महानगर प्रमुखमा उम्मेदवारी दिएर पछिल्ला दिनमा चर्चा पाएका र्यापर बालेन्द्र साह (बालेन) ले वडा नम्बर ९ मा रहेको तीनकुने गैरीगाउँस्थित अन्नपूर्ण केन्द्रबाट मतदान गर्दैैछन्। स्वतन्त्र उम्मेदवारी दिएका सुमन सायमीले कालीमाटी केन्द्रबाट मतदान गर्नेछन्।

गठबन्धनकै तर्फबाट उपप्रमुखमा उम्मेदवारी दिएका नेकपा (एकीकृत समाजवादी) का रामेश्वर श्रेष्ठले वडा नम्बर १२ र एमालेको तर्फबाट उपप्रमुखको उम्मेदवारी दिएकी सुनिता डंगोलले वडा २१ बाट मतदान गर्दैछन्।