काठमाडौँ- चीनका राष्ट्रपति सी जिन्पिङले यस हप्ता मध्य एसियाली मुलुकहरु कजाखस्तान र उज्बेकिस्तानको भ्रमण गर्ने भएका छन् । कोरोना भाइरस महामारीको प्रारम्भिक समययता हालसम्म उनको यो पहिलो विदेश भ्रमण हुने सोमबार जानकारी दिइएको छ ।

सीले उज्बेकिस्तानको समरकन्द शहरमा हुने साङ्घाई सहयोग सङ्गठन (एससीओ) का नेताहरुको शिखर सम्मेलनमा भाग लिने कार्यक्रम रहेको छ । यसअघि सार्वजनिक समाचारमा सीले यसै भ्रमणका क्रममा रुसका राष्ट्रपति भ्लादिमिर पुटिनसँग भेटवार्ता गर्ने बताइएको थियो ।

राष्ट्रपति सीले बुधबारदेखि शुक्रबारसम्म कजाखस्तान र उज्बेकिस्तानको भ्रमण गर्ने चिनियाँ विदेश मन्त्रालयले जारी गरेको विज्ञप्तिमा बताइएको छ ।

एससीओमा चीन, रुस, भारत, पाकिस्तान, साथै चार मध्य एसियाली देशहरु कजाखस्तान, किर्गिस्तान, उज्बेकिस्तान र ताजिकिस्तान सदस्य राष्ट्र छन् । यस शिखर सम्मेलन आगामी सेप्टेम्बर १५ र १६ मा उज्बेक शहर समरकन्दमा हुने तय भएको छ ।

यसअघि राष्ट्रपति सी सन् २०२० जनवरीमा म्यान्मारको भ्रमणमा गएका थिए । उनी फर्केको केही दिनपछि पूरै वुहान सहरलाई कोरोना भाइरसको प्रकोपले छोपेको थियो । त्यसयता उनले विदेश भ्रमण गरेका छैनन् ।