रत्ननगर- नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले मुलुकको आर्थिक समृद्धिसँग जोडिने विषयमा सबैको ऐक्यबद्धता हुनु आवश्यक रहेको बताएका छन्  ।

उद्योग वाणिज्य संघ चितवनको ५५ औँ वार्षिक साधारणसभा एवं अधिवेशनको उद्घाटन गर्दै उपाध्यक्ष ढकालले व्यवसायी, राजनीतिक दल र सरकारको एकमत भएमा मात्रै आर्थिक समृद्धितर्फ अघि बढ्न सहज हुने बताए  ।

सबैको सहकार्यमा संसारको सबैभन्दा राम्रो पर्यटकीयस्थलका रूपमा चितवनलाई स्थापित गराउन सकिने सम्भावना रहेको  ढकालले भने  । यहाँका सम्भावित सबै प्रकारका उद्योगमा मेरो व्यक्तिगत, नेपाल उद्योग वाणिज्य महासंघको संस्थागत तथा म अध्यक्ष रहेको बैंकको तर्फबाट जोडिन तयार रहेको उनले जानकारी दिए ।

अहिलेको विषम परिस्थितिबाट माथि उठ्नका लागि सबैको साथ र सहयोग आवश्यक छ । कोभिड–१९ को सक्रंमण तथा दुई देशको युद्धका कारण सबै क्षेत्रमा मूल्यवृद्धि भइरहेको ढकालको भनाइ छ ।

आगामी दिन अझ कठिन हुन सक्ने तर्फ हामी सबै सचेत हुनु जरुरी छ । यो अवस्थाबाट पार हुन सबै पक्ष जिम्मेवार भएर अगाडि बढ्नुपर्छ ।