काठमाडौँ- अफगानिस्तानमा तालिबानको कारवाहीमा परी ‘नेशनल रेजिस्टेन्स फोस’ एनआरएफका चार लडाकु मारिएका छन् ।

तालिबानको फौजले मुलुकको पूर्वमा रहेको बडाखशान प्रान्तमा सफाया कारवाही गर्दा एनआरएफका चार लडाकु मारिएको अफगानिस्तानको बख्तर समाचार संस्थाले जनाएको छ ।

सफाया कारवाहीका क्रममा एनआरएफको गढ पनि भत्काउन सफल भएको तालिबानले दाबी गरेको छ ।

बडाखशान प्रान्तका सूचना एवम् संस्कृति निर्देशक मोइजुद्दिन अहमदीले सफाया कारवाहीको पुष्टि गर्दै कारवाहीमा हवाइ बलका कमाण्डरको पनि सहभागिता रहेको दाबी गरेका छन् ।

यसबारे एनआरएफले कुनै टिप्पणी नगरेको अफगानिस्तानको समाचार संस्था खामाप्रेसले जनाएको छ ।

अफगानिस्तानको सरकारलाई अपदस्थ गरी तालिबानले सत्ता कब्जा गरेलगत्तै स्थापना भएको एनआरएफ लडाकु समूह र तालिबानबीच छिटफुट मुढभेडहरु हुँदै आएको खामाप्रेसले उल्लेख गरेको छ ।