मानव शरीरमा करिब ६ सय ५० मांसपेशी हुन्छन् । प्रत्येक मांसपेशीको अलग अलग काम हुन्छ । शरीरको तौलको करिब ४० प्रतिशत भाग मासुले बनेको हुन्छ तर मासु चाहिँ के ले बनेको हुन्छ ?

मासु तन्कन सक्ने फाइबर जस्ता पदार्थका समूहहरू मिलेर बनेको हुन्छ । मासुको प्रत्येक फाइबर करिब ४० मिलिमिटर लामो हुन्छ र तिनीहरू एक आपसमा बटारिएर फाइब्रिल्स वा मासुको चोक्टा बनेका हुन्छन् । फाइबर यति मसिना हुन्छन् कि एक सेन्टिमिटर मासुमा करिब १० लाखसम्म फाइबरहरु हुन्छ । फेरि प्रत्येक फाइबर स्नायुद्धारा सञ्चालित एवं नियन्त्रित हुन्छन् । त्यसैले नै ती फाइबरहरु एकापसमा बाँधिएका हुन्छन् र मासुको क्रियाकलाप निर्धारित भएको हुन्छ ।

कहिलेकाहीँ हामीले खुट्टाको नली हाडको पछाडि घुँडामुनिको भागको मासु सहनै नसक्ने गरी दुख्छ । त्यसलाई मासु फर्केको भनिन्छ । यस्तो पीडा कैयौँ मिनेटसम्म पनि भइरहन सक्छ । हामीले भोग्ने मासु फर्कने समस्या के हो ? यो किन हुन्छ त ?

कहिलेकाहीँ शरीरको मासु आकस्मिक रूपमा खुम्चन्छ । त्यस्तो बेला मासु अति नै दुख्छ । यही स्थिति हो ‘मासु फर्केको’ हो । यसरी ‘मासु फर्केको’ ठाउँको हड्डीमा र मासुमा अत्यन्तै ठुलो तनाव भइरहेको हामीलाई महसुस हुन्छ । हाम्रो ‘मासु फर्केको’ भाग मासु पहिलेकै अवस्थामा नआएसम्म त्यो कायमै रहन्छ ।