काठमाडौँ– गृहमन्त्री बालकृष्ण खाँणले गठबन्धनलाई बचाएर निर्वाचनलाई सफल रुपमा सम्पन्न गर्ने दायित्व आफ्नो भएको बताए । 

शनिबार काठमाडौंमा वृहत तरुण भेला उद्घाटन गर्दै खाँणले गठबन्धनलाई कायम राखेर आम निर्वाचन सुनिश्चित र सुरक्षितका साथै शान्ति सुरक्षा सहित सम्पन्न गर्ने दायित्व आफ्नो भएको बताएका हुन् । उनले अहिले गठबन्धन तोड्ने निर्णय कांग्रेसले नगर्ने भन्दै गठबन्धनको विषयमा गलत प्रचारका साथ कांग्रेसका कोही पनि नेताले भाषण गर्न नहुने धारणा राखे ।

त्यस्तै उनले देशका सबै तहमा कांग्रेसका नेता तथा कार्यकर्ताहरू रहेकाले सिट बाँडफाँड गर्दा आफ्नो प्रभाव बढि भएको क्षेत्र नगुमाउने गरि बुद्धिमतापूर्वक कांग्रेसले अडान राख्नुपर्ने बताए । 

संविधानलाई कार्यान्वयन गराउने प्रमुख दायित्व कांग्रेसको भएकाले सबै दललाई लिएर अघि बढ्ने दायित्व पनि कांग्रेसको भएको उनले बताए । खाँणले गठबन्धनका अर्को दलको उम्मेदवारलाई जिताउने चुनौति पार्टीमा रहेको बताए ।

उनले भोट ट्रान्सपर जस्तो चुनौतिपूर्ण काम गठबन्धनका अन्य दललाई पनि रहेकाले यसलाई सफलतापूर्वक सम्पन्न गर्ने उल्लेख गरे ।