काठमाडौँ – टेबुल टेनिसका राष्ट्रिय च्याम्पियन स्यान्टु श्रेष्ठलाई अखिल नेपाल टेबल टेनिस संघले बिदाइ गरेको छ।

संघको लैनचौरस्थित टेबल टेनिस कभर्डहलमा मंगलबार संघका राष्ट्रिय अध्यक्ष चतुरानन्द राजबैद्यले च्याम्पियन श्रेष्ठलाई राष्ट्रिय झण्डा ओढाएर बिदाइ गरेका हुन्।

संघका वरिष्ठ उपाध्यक्ष एवं काठमाडौँ जिल्ला टेबल टेनिस संघका अध्यक्ष धर्ममान बज्राचार्य, प्रमुख प्रशिक्षक संजीव कुमार ढुङ्गेल, प्रशिक्षकहरू, खेलाडीलगायतले श्रेष्ठलाई खादा, अबिरसहित उज्ज्वल भविष्यको लागि शुभकामनासहित बिदाइ गरे ।

स्यान्टु उच्च शिक्षा अध्ययन गर्नका लागि अस्ट्रेलिया प्रस्थान गर्दैछन् । ३ पटकको च्याम्पियन स्यान्टुले दक्षिण एसियाली खेलकुदमा १ रजत र ३ कांस्य पदक प्राप्त गर्न सफल भएका थिए ।