काठमाडौं– ताप लहरसँगै विद्युतको माग बढेपछि पाकिस्तानमा विद्युत कटौती बढ्न थालेको छ । पाकिस्तानका धेरै क्षेत्रहरुमा लामो समयसम्म विजुली जाने समस्या रहेको अन्तर्राष्ट्रिय सञ्चारमाध्यमले जनाएका छन् ।

पाकिस्तानका केही स्थानमा दैनिक ६ देखि १० घण्टासम्म लोडसेडिङ हुने भएपनि ग्रामिण क्षेत्रमा भने दैनिक १८ घण्टासम्म लोडसेडिङ हुने गरेको पाकिस्तानबाट प्रकाशित हुने डन अखबारको अनलाइन संस्करणले जनाएको छ ।

इन्धन तथा ग्यासको अभाव र थर्मल प्लान्टबाट हुने विद्युतको उत्पादनमा ह्रास आएसँगै पाकिस्तानमा विद्युतको संकट देखिएको बताइएको छ । पाकिस्तानमा कूल विद्युतमध्ये माग भन्दा ६ देखि ७ हजार मेगावाट कम बिजुली आपूर्ति हुने गरेको छ ।

ताप लहरका कारण खैबर पख्तुनख्वा क्षेत्रका केही स्थानमा १५ घण्टा सम्म लोडसेडिङ हुने गरेको छ । त्यसबाहेक कराँची र बलोचिस्तानका धेरै स्थानमा पनि लोडसेडिङको समस्या रहेको जनाइएको छ ।