काठमाडौँ– अमेरिकी सहायक विदेशमन्त्री डोनाल्ड लुले प्रमुख राजनीतिक दलका शीर्ष नेताहरूलाई फोन गरेका छन् ।

बिहीबार प्रधानमन्त्री तथा नेपाली काँग्रेसका सभापति शेरबहादुर देउवा, नेकपा एमालेका अध्यक्ष केपीशर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डलाई फोन गरी एससीसीका विषयमा भएको प्रगतिबारे बुझेका हुन् ।

लुले बेग्लाबेग्लै फोन गरेर एमसीसीको विषयमा चासो राखेका छन् । प्रधानमन्त्री देउवासँगको कुराकानीमा सहायकमन्त्री लुले लिखित प्रतिबद्धताअनुसार फेब्रुअरीभित्र सदनबाट एमसीसी पारित गर्न आग्रह गरेका थिए ।

जवाफमा प्रधानमन्त्री देउवाले आफूहरू एससीसी पारित गर्न प्रतिबद्ध रहेको र गठबन्धनका अरू नेतालाई पनि मनाउन प्रयास गरिरहेको बताए ।

त्यस्तै, ओली र प्रचण्डसँग पनि फोनमा लुले कुरा गरेका थिए । उनले दुवै नेतासँग एमसीसी पारित गरेर सहमति कार्यान्वयन गर्न आग्रह गरेका थिए ।

एमाले परराष्ट्र मामिला प्रमुख राजन भट्टराईले अध्यक्ष ओली र लुबीच भएको संवादमा जतिसक्दो चाँडो एमसीसी पारित गराउन ओलीलाई आग्रह गरिएको जनाए ।

जवाफमा ओलीले दुई मुलुकबीचको सम्बन्धमा आँच नआउने बताएको भट्टराईले जानकारी दिए ।