पथरी– मोरङको लक्ष्मीमार्गमा सम्पन्न पाँचौँ संस्करणको बेलबारी अन्तर्राष्ट्रिय आमन्त्रण गोल्डकपको उपाधि एपीएफ काठमाडौँले चुमेको छ । राजारानी धनकुटालाई १-० गोलअन्तरले स्तब्ध पार्दै एपीएफले उपाधि चुमेको हो ।

एपीएफका लागि खेलको ४८औँ मिनेटमा हरि कार्कीले गरेको गोल नै खेलको निर्णायक गोल बन्यो । पहिलो हाफ गोलरहित बराबरी खेलेको राजारानीले दोस्रो हाफमा गोल खान पुग्यो ।

खेलको म्यान अफ द म्याच गोलकर्ता कार्की घोषित भए भने वेस्ट गोलकिपर एपिएफका गोलरक्षक राजु नगरकोटी घोषित भए । खेलको वेस्ट डिफेन्स पिटर सैगुन, बेष्ट मिडफिल्डर मनी लामा (एपीएफ), बेष्ट स्ट्राइकर बुद्घ चेम्जोङ (राजारानी), बेष्ट कोच सुदीप श्रेष्ठ (एफिएफ), राइजिङ प्लेयर कासिम राई , हाइस्कोर फोडे फोफोना  र सर्वोकृष्ट खेलाडी टोपबहादुर विष्ट घोषित भए ।

प्रतियोगिताको विजेता एपीएफले नगद आठ लाख एक हजारसहित ट्रफी, मेडल र प्रमाणपत्र प्राप्त गर्‍यो  भने उपविजेता राजारानी क्लब धनकुटाले नगद  चार लाख एक हजार पुरस्कार प्राप्त गर्‍यो ।

प्रतियोगिताका सर्वोत्कृष्ट खेलाडीलाई २५ हजार, उत्कृष्ट गोलरक्षक, डिफेन्डर, सर्वाधिक गोलकर्ता, उदीयमान खेलाडी तथा मिडफिल्डरलाई १५-५ हजार र उत्कृष्ट प्रशिक्षकलाई रु १० हजार पुरस्कार प्रदान गरिएको छ । म्यान अफ द म्याचले रु पाँच हजार प्राप्त गरे । प्रतियोगितामा नेपालका सात र विदेशका तीन गरेर १० वटा टिम सहभागी थिए ।