काठमाडौँ– अभिनेत्री शिल्पा मास्केले आफ्नो लागि क्यारेक्टरले पाउने स्क्रिन स्पेश महत्वपूर्ण नहुने बताएकी छिन् ।

‘क्यारेक्टरले पाउने स्क्रिन स्पेश कस्तो छ वा त्यसको लम्बाइ कस्तो छ भन्दा पनि क्यारेक्टर कस्तो छ भन्ने मेरो लागि महत्वपूर्ण हुन्छ’ शिल्पाले भनिन् । उनी अभिनीत पछिल्लो फिल्म ‘लाइफ इन एलए’ को गीत सार्वजनिक कार्यक्रममा बोल्दै अभिनेत्री मास्केले आफूलाई सानो वा ठुलो भूमिकाले कुनै अर्थ नराख्ने स्पष्ट पारेकी हुन् ।

तीनवटा नेपाली फिल्ममा सोलो अभिनेत्रीको रुपमा अभिनय गरेकी शिल्पाले अचेल सानोतिनो भूमिकामा पनि काम गर्दै आएकी छन् । गत वर्षको पुषमा रिलिज भएको फिल्म ‘कठपुतली’ मा उनले ४६ सेकेन्ड मात्र स्क्रिन स्पेश पाएकी थिइन् । ‘लाइफ इन एलए’ मा पनि उनको रोल लामो छैन । ७० प्रतिशत अमेरिकामा खिचिएको फिल्मको ३० प्रतिशत हिस्सामा मात्र उनी देखिनेछिन् ।

सूर्य एन श्रेष्ठ निर्देशित फिल्ममा शिल्पासँगै ब्यास बिस्सु, अकेशा विष्ट, गौरव पहारी, बुद्धि तामाङ, प्रकाश घिमिरे, लोकेन्द्र लेखक, अमेरिकामा बसोबास गर्ने जारेड बिलप्स, साम भुजेल, जयन्द्र चिलुवाल लगायतको अभिनय छ । 

फिल्मको कार्यकारी निर्मातामा संसार अन्जान सुवेदी र निर्मातामा राजेन्द्र ठकुराठी छन् भने भुपेन्द्र अधिकारी र उज्ज्वल ढकालले मिलेर सम्पादन गरेका हुन।