जुम्ला- रोजगारीका लागि भारत गएका जुम्लावासी फर्कने क्रम सुरु भएको छ । दैनिक नेपालगन्जको रुपैडिया नाका हुँदै नेपाल फर्कने जुम्लावासीको घुँइचो लाग्न थालेको हो ।

गाउँमा रोजगारी अभावको कारण उनीहरू कामका लागि कालापहाड जाने गर्छन् ।

दसैँलगतै कालापहाड पसेका जुम्लावासी फागुन महिना लागेपछि घर फर्कन थालेका हुन् । ‘घरमै बसौँ रोजगारीका अवसर छैनन् । बेरोजगार भएर नाङ्गो परिवार टुलुटुलु हेरेर बस्न सकिँदैन,’ स्थानीय बिर्षबहादुर बुढाले भने, ‘कालापहाड रहर होइन, बाध्यता हो ।’

हिउँदको सुख्खा सिजनमा खेतीपातीका लागि कुनै काम नहुँदा आफूहरू कालापहाड जाने गरेको उनले बताए । घर फकिँदा सीमा नाकामा निकै सास्ती खेप्नु परेको गुनासो  उनीहरूले गरेका छन् ।  जुम्लाका एक नगरपालिका र सात वटै गाउँपालिकाबाट युवा कालापहाड जाने गरेका छन् ।

गाउँमा रोजगारीको कुनै अवसर छैन । कालापहाड जानुको विकल्प पनि हुँदैन,’ बिर्खबहादुरले भने, ‘कर्णालीका सबै जसो जिल्लाबाट मजदुरीको लागि कालापहाड जाने गरेका छौ । भारतका अधिकांश सहरमा कर्णालीवासी भेटिन्छन् । जुम्लामात्रै होइन कर्णालीबाट हजारौँ युवा कालापहाड जाने गर्छन् । गाउँमा आउने विकास निर्माणका काम पहुँचवालाको हातमा जान थालेपछि सर्वसाधारण कालापहाड रोज्न विवश हुने गरेको उनले बताए ।

युवा जति भारतमा जान थालेपछि गाउँमा बालबालिका, महिला र बूढाबूढी मात्र रहेको उनले बताए । काला पहाडबाट अटोरिक्सावालाले पनि दोब्बर रुपैयाँ लिने गरेको उनी बताउँछन् ।